永遠的野原新之助

靈感IQ稱得上,十分之高超,有個午睡老太婆,會嚇你一跳!飛機場大PAT PAT,好重要!

《蠟筆小新》的作者臼井儀人於今晚証實死亡。


我都算是一位小新迷,由小新第一期開始我就追捧,裡頭的笑點直到現在,每看一次都可以令我捧腹大笑。特別鍾意小新超粗的蠶蟲眉+超厚的面皮,周圍撩女仔,無大無細! 同爺爺銀之介一齊跳的白色長毛象舞;妹妹小葵點樣整蠱小新,見到靚仔雙眼發光等等...而令我最有得著的竟然是美冴對付小新的一身絕技,特別用拳頭轉太陽穴依招,我簡直得心應手!哈哈哈

由小不點的獨生子到做了哥哥的小新,一直都希望可以睇到佢長大成人,上小學,中學,結識女朋友,結婚,生子...好想睇到佢將來的老婆係咪一位美女,將來的小朋友會唔會有佢一半咁難搞...好想睇到佢長大,可惜...野原新之助今後都會長不大。

安息吧,臼井儀人!小新等我們照顧吧!